ياسمين عز تكشف سبب طلب يد المرأة عند الزواج وليس «ودانها»

كشفت الإعلامية ياسمين عز، مفهوم جملة "طلب اليد للزواج"؛ ولماذا اليد تحديدًا دونًا عن باقي أعضاء الجسم.

وقالت ياسمين عز، خلال تقديم برنامج "كلام الناس" عبر قناة "إم بي سي مصر": "ليه الراجل لما بيروح يتجوز أو يتقدم للست بيطلب إيدها مابيقولش يا عمي أنا طالب ودان بنتك أو مناخيرها، سؤال ممتاز، من الأسئلة اللي لازم نفكر فيها بعمق، وماتلاقيش إجابته إلا هنا عندي".

وأضافت: "خلونا نرجع للتاريخ، أول حاجة الرجل الفخيم رغم بساطته والبسيط رغم فخامته، السهل الممتنع، لما بيروح يطلب إيد واحدة في الأصل زمان قالوا عشان 3 أسباب، الأول لأن الإيد دي هي اللي بتطبخ، يعني هنا لازم البنت لما تتجوز تكون عارفة ان اساسيات الجواز هي الطبخ، لازم تتعلمي تطبخي، ولو بتعرفي يبقى تفلسفي في المطبخ وفي الأكل زي ما بتتفلسفي عليا"، حسب تصريحاتها ببرنامج "كلام الناس".

وتابعت: "واحدة هتطلع تقولي يعني انتي اختصرتي الموضوع وكياني في الطبخ، شوفي بقى تسرعك، والهجوم غير المبرر مش هيجيب لك جوازة حلوة، اصبري تتجوزي أحلى جوازة، اصبري عشان جوزك يقولك مراتي صابرة، اصبري واسمعي السبب الثاني، وهو الحاجة الوحيدة اللي يقدر يلبسك فيها خاتم أو دبلة هي إيدك، لذا اختار إيدك".

وأردفت ياسمين عز: "شوفي بقى لما صبرتي في السبب الأولاني الطبخ، نلتي السبب الثاني، قدمي السبت عشان تلاقي الأحد، تعملي له حلة محشي بجنيهات هو يقدم لك الأحد ويجيب لك دبلة ذهب، أو خاتم ألماس حسب مقدرته، انت قدمتي الطبخ وهو قدم الذهب والألماس، كم أنت كريم أيها الرجل، كم أنت عظيم أيها الرجل، كريم ومعطاء".

واستكملت: "أما السبب الثالث، الرجل عندما يطلب يد الست يكون مفقتد للحنان، وهي من ستعوضه، وهذه اليد الحاجة الوحيدة اللي بتطبطب، هدهدي، خليكي هدهودة".