3 كيلو قمح.. طريقة حساب قيمة زكاة الفطر بالورقة والقلم

شرحت دار الإفتاء المصرية طريقة حساب قيمة زكاة الفطر بطريقة سهلة وبسيطة وميسرة، تزامنًا مع حلول شهر رمضان المعظم، وقرب حلول عيد الفطر المبارك.

وقالت الإفتاء: “حسبناها على القمح اللي بيتعمل منه العيش اللي كل الناس فى مصر بتاكله، لأن بيوت كتير مش بتاكل لا رز ولا تمر ولا زبيب، طيب سعر أردب القمح كام 1700 جنيه، والأردب فيه 150 كيلو، يبقى سعر الكيلو كام 11.33 جنيه، إحدى عشر جنيه وثلاثة وثلاثين قرشًا، طيب والزكاة أد ايه 2.6 كيلو، يبقى نضرب 2.6 كيلو في 11.33 يطلع الناتج 29.46 جنيه، ودار الإفتاء قالت إن 30 جنيه الحد الأدنى، يعني طلع أكتر من 30 جنيه لو معاك ودخلك يسمح لك، بس اللي مش هيقدر فأقل حاجه يطلعها عن الفرد 30 جنيه”.

وأوضحت: “طيب أنا شايف أن 30 جنيه قليل مش هتعمل حاجه، يبقى تطلع ما ترضاه نفسك وتحس إنه له قيمه لكن لا تقل عن 30 جنيه، ولا تلزم غيرك يطلع زيك لأن ممكن يكون غير قادر، وتخرج قبل صلاة العيد”.

وأضافت الدار: “لو ملحقتش تطلعها ممكن تاخد برأي السادة الشافعية إنك ممكن تطلعها قبل غروب شمس يوم عيد الفطر”.