الرئيس السيسي: «ظروفنا الصعبة مكنتش سبب فيها والعمل والصبر طريق الحل»

قال الرئيس عبدالفتاح السيسي، إن الظروف الصعبة التي يمر بها الوطن هي نتيجة ظروف خارجة عن إرادة الحكومة.

وأوضح الرئيس السيسي، خلال كلمته في فعاليات الندوة التثقيفية الـ39 للقوات المسلحة، بمناسبة الاحتفال بذكرى يوم الشهيد: «عمري ما عاتبت حد وقلت وعدتوني إن إحنا هنبقى وهنبقى، لكن الظروف الصعبة اللي إحنا اللي فيها دي مجتش من مغامرة».

العمل والصبر

وأضاف: كلامي متغيرش من البداية وأهم حاجة العمل والصبر، ومقلتش أبدًا أنا لها أنا لها، وأنا أخلصكم، هاتوا كل كلامي من الأول أثناء الترشح هتلاقوا كلامي مبيتغيرش، لأن التوصيف مبيتغيرش، الظروف حلها الوحيد إحنا، وقلت قبل كده العمل والصبر هما الحل».

تحسن الأمور

وكشف الرئيس السيسي: «بقول الأمور ابتدت تتحسن، أنا مغمرتش بيكم، ومخدتش قرار أضيع بيه مصر، مغمرناش علشان خاطر هوا أو فهم خاطئ أو تقدير منقوص، أحنا مش فاسدين ومخدناش أموالكم وضيعناها بفساد أو دلع، وكل حاجة اتعملت على أرض مصر أي حد يشوفها».

وذكر: «أنا قولتلكم تعالوا نتولى المسؤولية، وليست المسؤولية قاصرة عليا لوحدي، والكلام مش بيتغير لأن التوصيف لا يتغير، الظروف حلها الوحيد العمل والصبر، عمري ما عاتبت حد، الظروف الصعبة اللي أحنا فيها دي مش أحنا اللي عملناها بمغامرة».

أزمة كبيرة

وقال الرئيس السيسي، إن مصر مر عليها أزمة كبيرة خلال الـ4 سنوات الماضية، بسبب أزمة كورونا والحرب الروسية الأوكرانية، وأخيرًا الحرب على قطاع غزة.

وأوضح: «الأزمة الكبيرة اللي عيشناها خلال الـ4 سنوات الماضية، كورونا والحرب الأوكرانية وغزة، هذا الأمر يعني تهديد لينا والمنطقة، والظروف اللي فاتت خلقت الضغط اللي اتحمله المصريين خلال الـ4 سنوات الماضية، خصوصًا السنة الأخيرة بما أن الأسعار زادت أكثر، أحنا 106 ملايين وحوالي 9 ملايين ضيف، والتحديات والمشاكل تحيط بمصر من جميع الانحاء».

وأضاف الرئيس السيسي: «عيشنا 10 سنوات قتال، وقبل منهم 2011، وبعدها 2013، كل ده له تكلفة، والتكلفة دي محدش لوحده يقدر يشيلها، لكن كلنا نقدر نشيلها»