هنا الزاهد: «أحمد فهمي خلاني أهلاوية بالعافية»
كشفت الفنانة هنا الزاهد عن العديد من تفاصيل حياتها الشخصية والفنية، وكشفت أن زوجها الفنان أحمد فهمي، أجبرها على أن تكون أهلاوية بعدما كانت تشجع الزمالك.
وكشفت هنا الزهد خلال لقاء لها مع الإعلامي عمرو أديب في برنامجه الحكاية تفاصيل تشجيعها للأهلي، حيث قالت: "أنا كنت زملكاوية وأحمد فهمي خلاني أهلاوية بالعافية، قالي مينفعش تبقى زملكاوية مينفعش قدام الناس تقولي إنك زملكاوية وتكسفيني عشان الناس عارفة إني أهلاوي جدًا، وقولت همشي أموري خلاص كده كده مليش في الكورة أوي".
وعن التعليقات السلبية التي تكتب لها قالت: "عشان أنت اخترت تكون ممثل لازم تستقبل كل اللي هيتقال عليك، بس أنا بصراحة بتأثر ولما بقرأ حاجة بضايق علشان أنا إنسانة، ولما بلاقي كومنت وحش بتأثر بيه جدا وبقول لأحمد وممكن أبعت للشخص برايفت أقوله ليه كتبت كده، ويقولولي أصل كنا عايزينك تردي علينا".
وقالت هنا الزاهد: "أنا مش بعمل شعري خالص وفي شغلي أغلب الوقت ببلبس بواريك لإني بخاف على شعري إنه يبوظ أو يقع، وشعري في الحقيقة كيرلي ولو طلعت بيه كيرلي مش هيبقى حلو هيبقى كارثة، وبشيل هم إني أروح البحر عشان بيبقى مش ألطف حاجة بيبقى عامل زي علي ربيع لما بينشف، وفهمي بيشوفه وبيحبه عادي".
