«أحسن حارس في العالم وفكرت في مستقبلي».. حمزه علاء يوجه رسائل نارية
نشر حمزه علاء حارس مرمى النادي الأهلي المنتهي عقده -ورفض التجديد- رسالة وداع لجماهير النادي الأهلي.
ورحل حمزه علاء عن الأهلي بنهاية دوري الموسم الماضي بعد نهاية تعاقده مع الفريق.
وقال حمزه علاء : «أكيد الكلام جاي متأخر وعشان كده حابب أعتذر، من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم في النادي الأهلي».
وتابع حمزه علاء : «قرار الرحيل كان صعب لكن كان لازم أن أفكر في مستقبلي. يمكن الفرصة مجتش زي ما كنت أتمنى بس كل حاجة بتحصل بيبقي ربنا كاتبها ورب الخير لا يأتي إلا بالخير، لجمهور النادي الأهلي العظيم محبتكم وشكركم عمرهم ما كانوا مرتبطين بعدد الدقايق اللي لعبتها دايما كنتوا سند في كل لحظة».
واستطرد حمزه علاء : «في كل بطولة حسيت معاكم إني أحسن حارس في العالم وأنا بلعب في بطوله افريقيا والاولمبياد، كل اللي طلبته، إنكم تفضلوا فاكرين إني كنت واحد منكم و ابن من ابناء النادي الأهلي».
لإدارة النادي بقيادة الكابتن محمود الخطيب، شكرًا على كل لحظة حسيت فيها إني جزء من الكيان.
لزمايلي إنتوا إخواتي وعيلتي اللي عمري ما هنسي أيامها وبتمني ليكم كل التوفيق والنجاح.
لكل مدرب اتمرنت معاه داخل النادي، شكراً من كل قلبي على كل لحظة دعمتوني فيها أو علمتوني فيها حاجة ، ولكل عامل تشرفت بالشغل معاه انتم عارفين معزتكم عندي.
ولشعب الاهلي هفضل دائمًا مشجع للكيان من قلب التالتة شمال ويا رب أرفع راسكم وأكون عند حسن ظنكم في خطوتي الجايه وتكونوا دائمًا في ضهري وسند ليا زي ما طول عمركم عودتوني.. اشوف وشكم علي خير.. ابنكم حمزه علاء ».
«بفتخر باللعب فيه».. حمزة علاء يوجه رسالة إلى جماهير الأهلي بشأن رفضه التجديد
وفي وقت سابق، رد حمزة علاء حارس مرمى الأهلي على الشائعات المتداولة بشأن رفضه التجديد للمارد الأحمر، مؤكدًا أنها غير حقيقية، ونشر علاء عبر حسابه على إنستجرام: "يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَأ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ".
وأضاف: "رسالة لجماهير النادي الأهلي الغالية، حابب أوضح حاجة مهمة بخصوص الكلام اللي اتقال عني في الإعلام مؤخراً، واللي بيقول إني رفضت أقعد مع إدارة النادي أو الناس المسؤولة في النادي اللي أتشرف بالانتماء ليه منذ طفولتي وحتى الآن، الكلام ده كله مش حقيقي ومفيش منه أي حاجة صح"
وتابع: "أنا عمري ما اتأخرت عن أي اجتماع يخص مصلحة النادي، وبحترم كل شخص مسؤول في الكيان ده، وموجود دايماً علشان أسمع وأتكلم في أي وقت يتطلب كده والنادي ده ليه مكانة كبيرة عندي، وكل يوم بفتخر إني بلبس التيشرت بتاعه، وبحس دايماً بدعمكم اللي لا يقدر بثمن، واللي هو الدافع الحقيقي في كل يوم ليا في نادينا العظيم".
واستطرد: "الجمهور النادي الأهلي، أنتم ليكم فضل كبير جداً عليا، وأنتم سبب كبير جداً ورئيسي في اللي وصلت له، مستحيل أنكر عمرهم ما كانوا عاديين، وأنا شايل ليكم تقدير وحب كبير فوق ما تتخيلوا، وبعتقد أن أنا حبي للنادي وللكيان ملوش حدود".
واختتم حارس الأهلي حديثه قائلاً: "عمري ما أقدر أغلط ولا في النادي ولا في جمهوره ولا في أي مسؤول داخل النادي، وأنا مش الشخص اللي يكون له موقفه مع النادي، فأنا أتشرف بالانتماء ليه ولجماهيره كل الاحترام للنادى الأهلى وجمهوره العظيم".